Žemaitėškā bȧ apsivažėma

Pariedīta tīms, katrë vuožuoj, ka žemaitems stavuoj suokas, vuo nȧ ruokundas.

Mažnė pu metu atėlduos „Ruodas“ gazieta atgajuojė. Daugis dingsniu bova kudie gazieta mustėjė kabavuotė bruki čiesa. Nunās glauniausē, ka gazieta vielėk ėšdrūkavuota ė šīn žiegi tiešėjas, ka kuožna mienesi vālīsȧm ėšdrūkavuotė pu vëna gazietas līki.

Gazietuo, kāp ė vetošiau būs rašuoma ė vuožnuom temuom, ale būs smuočē ė vairėnībiu, bē zabuovu. Vëna ėš gazietas navīnu ī šėts „Žemaitėškā bȧ apsivažėma“ kertelė.

Tonkē pasitruopėn ėšgėrstė stėčėnont, ka žemaitē nȧstavuoj atskėdas ruokundas, vuo vėn lietoviu ruokundas suoka. Šėta „Žemaitėškā bȧ apsivažėma“ kertelė būs truopniausis atruodavėms tīms dėktintuojīms, nes rets katros soszgrebins bėnt posė tuo, kas aurėn būs rašuoma. Rasintās kažkam ė pamačīs apvuožůtė tō, kō mes jau esam musintās nȧbgrīžtamā pateriuojė̄ – autentėška nȧsolietovinta buočiu ruokunda.

Daugis ėš jūsa prīš puora metu patiemėjuot kadarůnontės karužas cėmosėnies Skůda ulīčiuos. Karužas bova pakarkliůtas tǡp pat Muosiedie. Nunās ėš tuo žemaitėška īrinkė palėka gatavs mīzeris. Rēktom pakuolīt vėn Muosiedė launīstė, katruo žemaitėška karuža ėškeravuota. Vėsam kėtam stavuoklis so žemaitėškomo asablīvē vinkros.

„Juokiū žemaitėšku vieliavu mums nȧrēk“- če nȧ Merkėnės ė nȧ Šalčėninku prieteliu žuodē. Tǡp vuožůn žemaitėškiausio savėm dėktėnonťio Skůda apskrajė muokslėninčės formuons Vėrgėnėjos Juokšos. Jė tas nie škundals, ta kas tumet valėn būtė škundalo? Tas pats formuons prīš puora metu nȧpasibūgava žemaitėška karuža nušneikavuotė prīš pat siejės 1-ma. Nȧvierėjo, kumet plungėškis okstėn skůdėškems, ka Skůda mokslininčies daugis vākū par atlīda kuorėduoriūs ruokůn lietovėškā, vuo nȧ žemaitėškā. Kumet mokslėninčiuom vaduovaun veikiejē so tuokė povīza, katrë nȧpakošėnami net pu onštīkė so džiuovas ūžkrato, nȧprigolietom dīvītës, ka žemaitėškoms kaipst.

Skůda valďiuos puovīza i tō krengė ī nuognē majadnos. Būdama muokslėninčiu steigiejė anuos švëtėma skīrė furmuonė nȧžėna kadarůn valog muokslėninčė žemaitėškas karožas, a nē.

Asablīvē špėtuokliůtā veizas, kumet mers pasicekavëj, nuors dėktėn „Euruopas sājunga svarbiau nē Žemaitėjė“, ka pakabavůn cedelius už užslūgas žemaitėškomů. Pasivadintė muokslėninčiu formuonus ė pakaliavuotė anīms, ka nusitavuorītom karužas, katruos Skůda paštė ondeliůn, šėtā valdē juoks popėrmoms.

Savėvaldas lasėmā atsijuovėn ė lasintuojē užkargliůs sava agnasa kriuokaudama, vuo Skůdė rēk tuokiuos valďiuos, katra tǡp steigas ont žemaiėškoma, a nē.